குறிப்புக்கள் - (Notes)
வேறுபாடுகள் - (Pathanthara)
சில புத்தகங்களில் 7, 8 மற்றும் 9-வது சரணங்கள், முறையே 9, 7 மற்றும் 8-வதாகக் கொடுக்கப்பட்டுள்ளன.
¹ - ஸுர ஸேவ்ய - ஸுஜன ஸேவ்ய.
Top

மேற்கோள்கள்
⁹ - புருஷ - புருஷன் - இதுகுறித்து, 'ப்₃ரு₂ஹதா₃ரண்யக உபநிடதம்' கூறுவது -

"முன்னம் அவன் (பரம்பொருள்), பறவையாக (சூக்குமமாக), புரங்களில் (உடல்களில்) புகுந்தான்.
அவன் இங்ஙனம் அனைத்து புரங்களிலும் (உடல்களிலும்) உறைதலினால், 'புருஷன்' என்று அழைக்கப்படுவான்.
அவனால் சூழப்படாதது இங்கொன்றுமில்லை; அவனால் நிரப்பப்படாததும் இங்கொன்றுமில்லை." (உள்ளும் புறமும் அவனே) (II.v.18)
(ஸ்வாமி மாதவானந்தாவின் ஆங்கில மொழிபெயர்ப்பின் தமிழாக்கம்.)

¹⁰ - ஸால வித₃ளன - சால மரம் - குங்கிலிகம் - சால மரங்களைத் துளைத்தோன் - இராமன் ஏழு சால மரங்களை ஓரம்பினால் துளைத்தான். வால்மீகி ராமாயணம், கிஷ்கிந்தா காண்டம், 12-வது அத்தியாயம் (செய்யுட்கள் 1 – 4) நோக்கவும்.
Top

விளக்கம்
² - நிக₃ம நீரஜாம்ரு₂தஜ போஷக - மறைகளெனும் கமலத்தேனில் உதித்த (நாதத்தினை) பேணுவோன். தியாகராஜர், தமது 'நாத₃ தனுமனிஸ₁ம்' என்ற கீர்த்தனையில், நாதம், மறையின் சாரம் என்று கூறுகின்றார். எனவே, இங்கு 'மறைகளெனும் கமலத்தேனில் உதித்தது' - 'நாதம்' என்று பொருள் கொள்ளப்பட்டது.

³ - ஸத்கவி ஹ்ரு₂தா₃லய - நற்கவிகளின் உள்ளத்துறைவோன் - இது வால்மீகி மற்றும் வியாசர் போன்ற, காவியங்கள் இயற்றிய, முனிவர்களைக் குறிக்கலாம்.
Top

⁴ - வாகீ₃ந்த்₃ர - இதற்கு 'நாவரசி மணாளன்' என்று பொருள் கொள்ளப்பட்டாலும், இச்சொல், 'வாகி₃ந்த்₃ர' என்றிருக்கவேண்டும் என்று கருதுகின்றேன்.

⁵ - ஸு₁ப்₄ர - தூயோனே - சில புத்தகங்களில், இதனை, அடுத்துவரும், 'நாகே₃ந்த்₃ர ஸ₁யன' (அரவரசன் அணையோனே) என்பதுடன் சேர்த்து, 'ஸு₁ப்₄ர நாகே₃ந்த்₃ர ஸ₁யன' - (தூய அரவரசன் அணையோனே) என்று பொருள் கொள்ளப்பட்டுள்ளது.

⁶ - வர மந்த்ர க்₃ரஹண லோல - உயர் மந்திரத்தினை உணர்ந்தோரை விரும்புவோனே - சில புத்தகங்களில், 'மந்திரம்' என்பதற்கு, விசுவாமித்திரர், இராமனுக்கும், இலக்குவனுக்கும் புகட்டிய 'ப₃லை-அதிப₃லை' என்ற மந்திரங்கள் என்று பொருள் கொள்ளப்பட்டுள்ளது. அப்படி பொருள் கொண்டால், 'லோல' என்ற சொல் தனிப்படும் - அதற்கு, தனியாக, பொருள் கூற இயலாது. எனவே, 'காயத்திரி மந்திரம்' என்று பொருள் கொள்ளப்பட்டது.
Top

⁷ - அனுராக₃ ராக₃ ராஜித கதா₂ ஸார ஹித - எல்லா புத்தகங்களிலும், 'ராஜித' என்று கொடுக்கப்பட்டுள்ளது. 'ராஜித' என்ற சொல்லுக்கு, 'ஒளிரும்' என்று பொருளாகும். அத்தகைய பொருளுடன், 'ஹித' (இனியவன்) என்பதற்கு சரியான பொருள் கொள்ள இயலாது. எனவே, 'ஹித' என்ற சொல்லுக்கு 'உறைவோன்' என்ற பொருள் கொள்ளப்பட்டது. ஆயினும், எனக்குத் தெரிந்தவரை, 'ராஜித' என்பதற்கு பதிலாக, 'ராசித' (இயற்றப்பெற்ற) என்றிருந்தால், 'ஹித' என்று சொல்லுக்கு, 'இனியோன்' என்று பொருள் கொள்ளலாம். 'ராசித' மற்றும் 'ரசித' என்ற சொற்களுக்கு ஒரே பொருள்தான்

'காதல், இசையுடன் இராம காதை சாரத்தினை இயற்றியோருக்கு இனியவன்' - இது தியாகராஜரைப் போன்று, இராம காதையினை இசையுடன் பாடியவர்களைக் குறிக்கலாம்.

⁸ - ஓங்கார பஞ்ஜர கீர - ஓங்காரமெனும் கூண்டுக் கிளியே - தியாகராஜர், தமது 'ஓ ராம ஓ ராம' என்ற ஆரபி₄ ராக கீர்த்தனையில், இராமனை, 'ஓங்காரத்திலுறைவோன்' என்று கூறுகின்றார்.

¹¹- அத்₃பு₄த ஸு-கவி ஜன ஹ்ரு₂த்ஸத₃ன - அற்புத நற்கவிகளின் இதயத்துறைவோன் - இது வால்மீகி முனிவர் போன்றோரைக் குறிக்கலாம்.
Top

விண்ணரசன் - பரிதி.
உம்பர் தரு - விரும்பியதருளும் கற்ப தரு.
வெண்ணெய் - இதனை 'பாலாடை' என்றும் கொள்ளலாம்.
மூப்பற்றோர் - கண்ணிமையாதார் - வானோர்.
முகிலுக்குப் புயலே - முகிலை விரட்டும் புயலேயென.
வானரர்கள் தலைவன் - சுக்கிரீவன்.
இந்திர நீலமணி - நீலக்கல் வைரம்.
நாவரசி மணாளன் - பிறவாதவன் - பிரமன்.
அரவரசன் - சேடன்.
முனிவர் சாபம் - அகலிகையினுக்கு அவள் கணவர் கௌதம முனிவரிட்டது.
உயர் மந்திரம் - காயத்திரி.
சசி மணாளன் - வாசவன் - இந்திரன்.
காதலுடன் - அனுராகம் எனப்படும் இறைவனிடம் கொள்ளும் பெருங்காதல்
காதை - இராம காதை - இராமாயணம்.
சுரசையின் பகைவன் - அனுமன் - அனுமனை சோதிக்க வானோரால் ஏவப்பட்டவள்.
வாசவனின் பகைவன் - இந்திரசித்து - இராவணனின் மகன்.
வாசவனின் பகைவன் தந்தை - இராவணன்
நமனுக்குப் பிறை சூடிபோன்றோனே - (உவமை) நமனை உதைத்த சிவனைப் போன்று என.
புற்றிலுதித்த முனி - வால்மீகி.
கலசக் கடலுதித்தவள் - இலக்குமி.
Top